SINUS Magnus

SINUS Magnus

Ptol. pars est Oceani Eoi seu Orientalis. Vulgo Golfe de Cochinchine, seu etiam Golfe d'Hainam dicitur; estque inter partem australem Imperii Sinarum, regnum Cocinchinae, et Haynamum insulam. Est autem Sinus Maris, pars eius curvô litore intercepta, seu littorum recessus, in quem Mare se insinuat; Ital. Golfo: quos duûm generum constituit Auctor Histor. Orbis Terr. Geogr. et Civ. c. 3. §. 6. oblongos et latos; de quibus vide hîc infra.

Sinus Maris oblongi.

α. Mare Mediterraneum, Europam a Borea, Africam ab Austro, Asiam ab Oriente habet: ipsumque Sinus alios minores, nec tamen minus celebres emittit, e quibus Oblongi quidem sunt, Mare Adriaticum, Golfo di Venetia. Tarentinum, Golfo di Taranto in Mari Aegeo, Sinus Thessalonicensis, Golfo di Salonichi. Quibus additur Propontis, Sinum per Hellesponti fretum Mari Mediterraneo communicans. Pontus Euxinus Bosporo Thracico Propontidi annexus; qui ipse etiam alium non ignobilem format Golfo di Nigropoli appellatum. Palus Maeotis. Lati seu Hinates, duo, Syrtis maior et minor Golfo du Capis. β. Mare Balthicum, olim Sinus Codanus, tres alios Sinus secundarios non ignobiles habet, Botnicum, Finnicum et Livonicum. γ. Mare Rubrum, seu Sinus Arabicus communiter Mar di Mecca, ex Oceano Indico fluit, ad Aden urbem et promontor. Africae; ac inter Africam versus Occidentem, et Arabiam versus Orientem, decurrens, sistitur ad urbem Suez, ubi Turcicae classis statio: Eius fretum Babelmandel. δ. Sinus Persicus, seu Mare Persicum, Mare Elcatif, inter Arabiam ab Occasu et Persiam ab Ortu decurrit. Addunt quidam et Sinum Coreensem Golfo de Nanquin, sed cum neutram Insulam esse recentiorum observationbus constet, Mare ipsas interluens Fretum potius, quam Sinum, vocare convenit. Vide Tabulas de Witt. et Tab. Amer. adnexam ltinerario Th. Candischii p. 50.

Sinus lati seu hiantes.

α. In Asia, Sinus Gangeticus, Golfo di Bengala, terminatur littore Coromandelicô, Indiâ, Pegu, Siam, Malaccâ etc. β. Inter Malaccam et Cambaiam. γ. In Europa, iuxta Russiam, Mare Album. δ. In America, Sinus Mexicanus, qui inter Americam Septentrionalem et Meridialem decurrens terminatur Isthmô Panamae. ε. Mare Hudsonii, Americae Septentrionalis inter Novam Franciam effusum Estotilandiam usque. ζ. S. Lautentii Sinus, inter Canadam, Novam Franciam et Terram Novam. Quo pertinet etiam Mare Caspium, Lacus nomine potius, quam Maris nominandum, quia Oceano manifestô ductu non adhaeret, nisi cum Ponto Euxino et Mari Persico per occultos cuniculos connecti dicas, quod ingeniose probat Kircherus M. S. l. 2. c. 13.